روس تے اسلامی دنیا وچال میڈیا دے شعبے اچ تعاون کوں تکڑا بݨاوݨ دی لوڑھ اے ،ماسکو اچ بین الاقوامی کانفرنس توں مقررین دا خطاب

ماسکو۔16دسمبر(اے پی پی) سچ دے ودھارے تے مس انفارمیشن دا مقابلہ کرݨ کیتے روس اتے اسلامی دنیا وچال میڈیا دے شعبے اچ تعاون ودھاوݨ دی لوڑھ اے ۔ اے ڳالھ روس دے دارالحکومت ماسکو اچ ’’ روس تےاسلامی دنیا۔ میڈیا دے شعبے اچ تعاون دے عملی اقدامات‘‘دے موضوع تے منعقدہ کانفرنس توں خطاب اچ مقررین آکھی اے ۔ جاری پریس ریلیزموجب کانفرنس دا اہتمام اوآئی سی نیوز ایجنسیز دی یونین( یواین اے) ،گروپ آف سٹریٹجک وژن رشیا۔ اسلامک ورلڈ اتے سپتنک انٹرنیشنل نیوز ایجنسی کیتا ہئی ۔ بین الاقوامی کانفرنس اچ روسی فیڈریشن دے حکام، اسلامی تعاون تنظیم، علاقائی اتے بین الاقوامی اداریں دے نمائندیں اتے مختلف ملکاں توں تعلق رکھݨ آلے میڈیا ماہرین شرکت کیتی ۔ تاتارستان دے صدر اتے گروپ آف سٹریٹجک وژن ’’ رشیا ۔اسلامک ورلڈ ‘‘ دے چیئرمین رستم منی خانوف کانفرنس توں آپݨے وڈیو خطاب اچ آکھیے جو روس اتے اسلامی دنیا وچال تعلقات تاریخی لحاظ نال اعلیٰ درجے دے اعتماد اتے تعاون نال عبارت ہن۔ کوڑیاں خبراں کھںڈاوݨ دا مقابلہ کرݨ کیتے سانجھے تعامل دی لوڑھ تے زور ݙیندے ہوئیں انہاں آکھیے جو مسلم ملکاں دے نال ذرائع ابلاغ عامہ دے ذریعے تعاون روس دی بین الاقوامی پالیسی دا بنیادی پہلو اے۔فیڈریشن کونسل کمیٹی آن انٹرنیشنل افیئرز دے چیئرمین گریگوری کاراسین ایں موقع تے آپݨے خطاب اچ ایں ڳالھ کوں چاتے جو روس مختلف قومیتاں اتے مذہب دے منݨ آلیں دا ملک اے تے ایندے شہری روایتی طور تے اسلامی ملکاں نال تعلقات تکڑے کرݨ دے حامی ہن ۔ ایں کانفرنس دے انعقاد دا مقصد یونین آف او آئی سی نیوز ایجنسیز اتے روسی ذرائع ابلاغ دے وݙے اداریں وچال براہ راست تعاون دے قیام دے طریقیں تے ڳالھ مہاڑ کرݨا اے تاں جو روس تے مسلم ملکاں وچال مساوی بنیاداں تے تعاون ودھاوݨ تے شہریاں کوں سچی اتے حقیقت تے مبنی تعصب توں پاک اطلاعات تئیں رسائی دے برابر دے موقع ݙتے ونڄ سڳن ۔او آئی سی کیتے روسی فیڈریشن دے مستقل مندوب رمضان عبدالطیفوف ایں موقع تے اوآئی سی دے سیکرٹری جنرل اتے روس کیتے اناہں دے نائب دے نال آپݨی ملاقاتاں دا ذکر کریندے ہوئیں ݙسایا جو انہاں ملاقاتاں اچ ݙوہیں فریقین وچال تعامل کیتے رہنما خطوط مرتب کیتے ڳئن ۔ انہاں آکھیے ہݨ اساں روس تے او آئی سی تعاون دے اہم پہلو کیتے معلومات تے مبنی مدد و حمایت ݙیوݨی اے ۔ یونین آف او آئی سی نیوز ایجنسیز دے قائم مقام ڈائریکٹر جنرل محمد عبدالربو الیامی کانفرنس توں آپمے ویڈیو خطاب اچ روس تے اسلامی ملکاں وچال لمبی مدت تعاون کوں ودھاوݨ اچ گروپ آف سٹریٹجن وژن دے نمایاں کردار دی تعریف کیتی ۔ کانفرنس کراوݨ دا مقصد اسلامی دنیا اتے روس وچال ذرائع ابلاغ دے شعبے اچ تعاون کیتے عملی اقدامات دی ڳولݨ اے۔ انہاں کانفرنس اچ شریک سارے مندوبین تے زور ݙتا جواو بطور صحافتی ادارہ یونین آف او آئی سی نیوز ایجنسیز دی استعداد توں فیدہ چاون ۔ یونین آف او آئی سی نیوز ایجنسیز دا غیر جانبدار انٹرنیشنل ٹریننگ سینٹر اپݨے 57 رکن ملکاں تے چار ٻئے ملکاں توں نمائندیں دا مرکز اے تے ترائے بین الاقوامی زباناں عربی، انگریزی اتے فرانسیسی اچ خبراں دا بین الاقوامی پلیٹ فارم اے۔ انہاں آکھیے یونین آف او آئی سی نیوز ایجنسیز اپݨے شروع توں ہی اعتدال پسندی تے اسلامو فوبیا دی مختلف صورتاں دے اظہار دی مخالفت دے اصولاں تے کاربند اے۔ متحدہ عرب امارات دے خبر رساں ادارے وام دے ڈائریکٹر جنرل محمد جلال الرئیسی آکھیے روس اتے مسلم دنیا پراݨے تے تاریخی رشتے نال گھنڈیے پئن تے متحدہ عرب امارات کوں روس نال آپݨے وݙی مدت تاریخی تعلقات تے فخر اے۔ او آئی سی دے میڈیا اینڈ کمیونیکیشن ڈیپارٹمنٹ دے ڈائریکٹر وجدی سندی آپݨے خطاب اچ میڈیا دے شعبے تے روس دے ممتاز صحافتی اداریں وچال سٹریٹجک شراکت داری دے قیام دی اہمیت تے زور ݙتا ۔ انہاں آکھیے اوآئی سی میڈیا دے شعبہ اچ تعاون تے یکجہتی کوں تکڑا بݨاوݨ دی حوصلہ افزائی کریندی اے ۔ روسی وزارت خارجہ دے پریس سینٹر دے سربراہ تے ڈیپارٹمنٹ آف انفارمیشن اینڈ پریس دے ڈپٹی ڈائریکٹر ایوان نیکایوف اپݨے خطاب اچ مسلم ملکاں دے صحافیاں نال آپݨی وزارت دے تعامل دی تفصیلات بارے ݙسایا ۔ انہاں آکھیے اسلامی دنیا نال تعاون دا ودھارا روسی خارجہ پالیسی ڈاکٹرائن دی اہم ترین ترجیح اے۔ ایں موقع تے یونین آف او آئی سی نیوز ایجنسیز اتے انٹرنیشنل وڈیو ایجنسی (رپٹلی) جیڑھی ویژوئل نیوز کانٹینٹ ݙیوݨ کیتے اہم اے وچال مفاہمت دی یادداشت تے دستخط کیتے ڳئن ۔

مضمون کا ماخذ : bolão lotofácil

متعلقہ مضامین