اسلام آباد۔24اپریل (اے پی پی):سپریم کورٹ فوجی عدالتاں اچ سویلینز دے ٹرائلز دے خلاف کیس ججز کمیٹی کوں واپس بھجویندے ہوئیں سماعت غیر معینہ مدت تئیں ملتوی کرݙتی اے ۔ سپریم کورٹ اچ جسٹس امین الدین خان دی سربراہی اچ جسٹس محمد علی مظہر، جسٹس سید حسن اظہر رضوی، جسٹس شاہد وحید، جسٹس مسرت ہلالی اتے جسٹس عرفان سعادت خان تے مشتمل 6 رکنی لارجر بنچ کیس تے سماعت کیتی ۔ سماعت تے اٹارنی جنرل منصور عثمان اعوان عدالت کوں ݙسائے جو عید الفطر توں پہلے 20 ملزماں کوں رہا کرݙتا ڳئے جیڑھے آپݨے گھر ٹر ڳئن ۔ انہاں آکھیے ھک متفرق درخواست دے ذریعے رہا تھیوݨ آلیں دی تفصیل وی عدالت اچ جمع کراݙتی اے ۔ دوران سماعت ایں موقع تے جسٹس محمد علی مظہر پچھیے جو کیا ہݨ رہا تھیوݨ آلے ملزمان دے خلاف کوئی کیس کائنی ؟۔ بیرسٹر اعتزاز احسن عدالت اچ موقف اپنائے جو انہاں ملزمان کوں سزا یافتہ کر تے گھر بھیج ݙتا ڳئے ۔ انہاں آکھیے ھک ٻال ٹرائل دے بغیر سزا یافتہ تھی ڳئے تے ہݨ او لکدا ودے ۔ جسٹس امین الدین خان سوال کیتے جو تساں جیندی ڳالھ کریندے پیو اٹارنی جنرل دی جمع کرائی ڳئی فہرست اچ شامل اے؟۔ اعتزاز احسن آکھیے او فہرست اچ شامل اے۔ ایں موقع تے عدالت اٹارنی جنرل دے بیان کوں ریکارڈ دا حصہ بݨا ݙتے۔ درخواست گزار جسٹس جواد ایس خواجہ دے وکیل خواجہ احمد حسین بینچ تے اعتراض چیندے ہوئیں آکھیے 9 رکنی بنچ دی تشکیل سانڳے معاملہ ول ججز کمیٹی کوں بھیجا ونڄے۔ سماعت دے دوران اعتزاز احسن تے ٻئے وکلا وی عدالت توں استدعا کیتی جو فیصلیں کوں ریکارڈ تے گھن آیا ونڄے ۔ انہاں مؤقف اختیار کیتے 20 ملزمان دی حد تئیں جیڑھے فیصلے سݨائے ڳئن انہاں کوں ریکارڈ تے گھن آیا ونڄے ۔ عدالت ریمارکس ݙتن جو فیصلیں دی نقل منگ گھندوں۔ جسٹس شاہد وحید اپݨے ریمارکس اچ آکھیے اساکوں پتہ تاں لڳے جو ٹرائل اچ کیا طریقہ کار اپنایا ڳئے؟، بعد اچ سپریم کورٹ ملٹری کورٹس دے فیصلیں دی نقل منگ ڳھدن۔ سپریم کورٹ ریمارکس ݙتن ججز کمیٹی فیصلہ کریسی جو ایں کیس کوں موجودہ بینچ سݨسی یا لارجر بینچ اے کیس سݨسی ۔ سپریم کورٹ فوجی عدالتاں اچ سویلینز دے ٹرائلز دے خلاف کیس ججز کمیٹی کوں واپس بھجویندے ہوئیں کیس دی سماعت غیر معینہ مدت تئیں ملتوی کرݙتی۔
