اسلام آباد۔17مارچ (اے پی پی) وزیراعظم محمد شہبازشریف آکھیا جو حکومت وکیلاں دے تحفظ کیتے وکلا تحفظ بل 2023 پارلیمنٹ اچ پیش کرݨ، کپاہ دی امدادی نرخ 8500 روپے فی مݨ کرݨ دی منظوری ݙتی اے۔ وزیراعظم آفس دے میڈیا ونگ توں جاری بیان موجب اے ڳالھیں انہاں اپݨی صدارت وفاقی کابینہ دے اجلاس اچ آکھی۔ وزیراعظم آکھیاجو وکلا دا پاکستان دے آئینی ارتقا اچ اہم کردار اے۔ حکومت وکلا دے تحفظ کیتے وکلاتحفظ بل 2023 پارلیمنٹ اچ پیش کرݨ کیتے منظور کر ڳھدے۔ انہاں آکھیا جو کپاہ دےکاشتکاراں دی فصل کوں منافع بخش ٻݨاوݨ کیتے 8500 روپے فی مݨ دے امدادی نرخ وی منظوری ݙتی اے۔ ایس ایم ای بینک دے صارفین دی جمع کرائی گئی رقوم دے تحفظ کوں یقینی ٻݨایا ونڄے۔ انہاں ہدایت کیتی جو وائنڈنگ ڈاؤن وچال صارفین کوں ڈیپازٹس دی واپسی دا خاص خیال رکھیا ونڄے۔ کابینہ وزارتِ خزانہ دی سفارش تے سکیورٹی اینڈ ایکسچینج کمیشن آف پاکستان دے مختلف ملکاں اتے بین الاقوامی اداریاں نال 15 آپسی اتے ݙو کثیر طرفہ مفاہمتی یادداشتاں دی ایکس پوسٹ فیکٹو دی منظوری ݙتی اے۔ وفاقی کابینہ وزارتِ داخلہ دی سفارش تے سعودی حکومت ولوں محمد وسیم اسلم ولد محمد اسلم دی سعودی عرب حوالگی کیتے ایڈیشنل ڈپٹی کمشنر دی سربراہی اچ ایکسٹراڈیشن ایکٹ 1972 دے تحت انکوائری کمیٹی ٻݨاوݨ دی منظوری ݙتی اے۔ حکومت پاکستان دا سعودی حکومت نال مجرماں دی حوالگی بارے معاہدہ موجود اے۔ محمد وسیم اسلم سعودی حکومت کوں قتل دے کیس اچ مطلوب اے۔ وفاقی کابینہ وزارتِ مذہبی امور اتے بین المذاہب ہم آہنگی دی سفارش تے پاکستان سکھ گردوارہ پربندھک کمیٹی (پی ایس جی پی سی) ٻݨاوݨ دی منظوری وی ݙتی اے۔ وفاقی کابینہ کابینہ کمیٹی برائے لیجسلیٹو کیسزدے13مارچ 2023 دے اجلاس اچ کیتے ڳے فیصلے دی وی توثیق کیتی جئیں اچ وکلا تحفظ بل 2023 دی منظوری کیتی ڳی۔
